RI’YADDA ARSENAL MA RUN BAY NOQON?

Weeraryahanka reer Montenegro Stevan Jovetic oo muddo dheer lala xariirinaayay kooxda Arsenal ayaa haatan lagu wadaa inuu garoonka Emirates u soo dhaqaaqo marka la gaaro bisha June. Sidoo kale markii ugu horeysay kooxdiisa Fiorentina ayaa qiratay inay laacibkan laga daba dhici fasaxi doonto waxayna kooxda reer Talyaani suuqa ka baadi goobeysaa weeraryahankii baddali lahaa xidigan dhallinta yar. Sida la filaayo 23-jirkan ayaa Fiorentina isaga tagi doono marka uu xilli cayaareedkan dhammaado Serie A-da wuxuuna maamulka kooxdiisa ka codsaday in kooxda Arsenal laga iibiyo waayo laacibkan ayaa aad u jecel inuu ka hoos cayaaro tababare Arsene Wenger.

Horey marar badan ayay Gunners-ka ugu fashilmeen inay weeraryahankan soo xero geliyaan, balse haatan waxay heystaan fursaddii ugu wanaagsaneed oo ay Jovetic kula soo wareegi lahaayeen. Inkastoo xidigan uu rabitaankiisa muujiyay haddana Arsenal qiimo jaban kuma heli doonto waayo waxaa madaxiisa la dul dhigay 30-milyan oo euro ah. Jovetic wuxuu kooxdiisa Fiorentina u dhaliyay 23-gool 48-kulan ee ugu dambeesay Serie A-da dalka Talyaaniga waxaana sidoo kale lala xariirinaa kooxda Juventus inkastoo dhawaan ay Juve shaaca ka qaaday inaysan wax xiiso ah u qabin weeraryahankan waxaana ugu wacan in Juventus iyo Fiorentian uusan xiriir wanaagsan ka dhaxeenin.

Dhanka kale kooxda Fiorentina ayaa sheegtay in Jovetic booskiisa ay soo iibsan doonto bisha xidiga naadiga Southampton Gaston Ramirez oo horey ugu cayaari jiray kooxda Bologna balse haatan waqti wanaagsan ku qaadanaayo Premiership-ka dalka England.